ಹೆಸರು : ಶ್ರೀ ಭೀಮರಾಯರು., ಹೊಳೇ ನರಸೀಪುರ
ಕಾಲ : ಕ್ರಿ ಶ 1902 - 1963
ಉಪದೇಶ ಗುರುಗಳು : ಶ್ರೀ ಉರಗಾದ್ರಿವಾಸ ವಿಠ್ಠಲರು
ಅಂಕಿತ : ಶ್ರೀ ಕೃಷ್ಣವಿಠ್ಠಲ shreekrishnavittala
ಕೃತಿ :
ಶ್ರೀ ಕೃಷ್ಣ ವಿಠ್ಠಲರು.......
" ಭಾಷ್ಯಾನುಸಾರಿ ದಶೋಪನಿಷತ್ತುಗಳನ್ನು ಭಾಮಿನೀ ಷಟ್ಪದಿಯಲ್ಲಿ ಪ್ರಮೇಯಭರಿತವಾದ " ಕೃತಿಗಳನ್ನು- ಎಲ್ಲರಿಗೂ ಅರ್ಥವಾಗುವ ಶೈಲಿಯಲ್ಲಿ ಸರಳ ಸುಂದರವಾಗಿ ಅಚ್ಛ ಕನ್ನಡದಲ್ಲಿ ರಚಿಸುವುದರ ಜೊತೆಯಲ್ಲಿ ಅನೇಕ ಪದ - ಪದ್ಯಗಳನ್ನು ರಚಿಸಿ ಹರಿದಾಸ ಸಾಹಿತ್ಯಕ್ಕೆ ತಮ್ಮ ಕೊಡುಗೆಯನ್ನು ನೀಡಿದ್ದಾರೆ!!
ರಾಗ : ಶಂಕರಾಭರಣ ತಾಳ : ಆದಿ
ಯಾವ ಗುರುಗಳಿಗುಂಟು -
ಈ ವೈಭವವು ।
ಪವನನೊಡೆಯನ ಭಕ್ತ ರಾ-
ಘವೇಂದ್ರರಿಗಲ್ಲದಲೆ ।। ಪಲ್ಲವಿ ।।
ವರ ತುಂಗಾ ತೀರದಲಿ ।
ಮೆರೆವ ಮಂತ್ರಾಲಯದಿ ।
ತರಣಿಯಂದದಿ ಮೆರೆದು । ಭ ।
ಕ್ತರನು ಪೋಷಿಸುವ ।
ಶರಣ ರಕ್ಷಕನೆಂಬ ।
ಬಿರುದಿಂದ ತಾ ಮೆರೆವ ।
ವರ ಮಧ್ವ ಕುಲಚಂದ್ರ ।
ಗುರುರಾಜಗಲ್ಲದೆ ।। ಚರಣ ।।
ಸಂತರೆಲ್ಲರೂ ಬಂದು ।
ಶಾಂತಿಯಿಂದಲಿ ನಿಂದು ।
ಕಂತುಪಿತನ ಭಕ್ತ ।
ಚಿಂತೆಯನ್ನು ಹರಿಸೆಂದು ।
ಸಂತತವು ಬೇಡುತಿಹ ।
ಶಾಂತರಾಗಿಹ ಜನರ ।
ಸಂತೋಷದಲಿ ಕಾಯ್ವ -
ಗುರುರಾಜಗಲ್ಲದೆ ।। ಚರಣ ।।
ಕಾವಿ ವಸ್ತ್ರವನು ಧರಿಸಿ ।
ಕವಿದ ಭ್ರಮೆಯನು ಬಿಡಿಸಿ ।
ಭುವಿಜ ರಮಣನ ಭಜಿಪ ।
ಕವಿ ಕುಲೋತ್ತಮ ನಮ್ಮ ।
ಸೇವಕರ ಸುರಧೇನು ।
ಪಾವನಾತ್ಮನು ಆದ ।
ಕೃಷ್ಣ ವಿಠ್ಠಲನ ಭಕ್ತ -
ಗುರುರಾಜಗಲ್ಲದೆ ।। ಚರಣ ।।
